Zanter 1955, wou d’Fuesgecken sech zu Péiteng zesummegedoen hate fir d’Kavalkad ze organiséieren, hunn sech vu Joer zu Joer ëmmer méi Leit ugesprach gefillt, matzemaachen.

D’Kavalkad ass séier ausgebaut ginn an an deem Kontext ass 1959 eng Karnevalsgrupp vun Tréier zu Péiteng opgetratt. Dës ass gutt bei de Péitenger Leit ukomm, an no hirem Passage huet de Pier Zenner den Hary Welter gestëppelt, fir eppes Änleches zu Péiteng op d’Been ze bréngen (d'musst ee wëssen, den Hary Welter war de Wiert am Siège social vun dem Turnveräin „ La Courageuse“). A wéi et sollt kommen, déi Zwee sinn Hëllef sichegaangen, an hunn um Familljenowend vun der Courageuse 1960 Bidderieden zum Beschten ze ginn.

Ënnert dem Numm „Abrëllsgecke“ sinn se op de Kapesëtzunge bis 1979 opgetrueden, mat Texter a Lidder, déi se fir sech an och fir Anerer geschriwwen hunn.

No enger laanger Paus, a wéi 2008 de Kommitee vun der „Société carnavalesque et folklorique du Péitenger Wand » d’Bengele bei Tromm gehäit hat, gouf den 16. Januar de „Karneval Gemeng Péiteng“, kuerz de KaGePe gegrënnt.

Den neie Kommitee huet decidéiert, fir net nëmmen d’Kavalkad ze organiséieren, mee fir ze och nees mat enger Kapesëtzung ze koppelen.

An aller Vitesse sinn Acteure gesicht ginn, Texter goufe geschriwwen, Lidder si arrangéiert ginn, de Bünendekor gouf gebaut an opgeriicht, an 8 Wochen no der Iddie stoung de volle Programm, an ass mat groussem Engagement op der Kapesëtzung opgefouert ginn.

D'Nofro un Entréesbilljeeë war esou grouss, dass gläich zwou Kapesëtzungen dat Joer op d’Bee gestallt goufen.

Vun 2008 u bis haut, hunn d'Kapesëtzunge vum KaGePe net un Attraktivitéit bei de Leit verluer. An der Reegel stinn all Joer véier Virstellunge fest um Programm, ausser zum Beispill an de Joren 2011 an 2018, wou deemools esouguer fënnef ausverkaafte Virstellungen iwwert Bün gaange sinn.

Ouni Zweifel sinn "KaGePe's Kapesëtzungen" alle Fuesgecke vu "wäit a breet" ë Begrëff, a nieft der Kavalkad, deen absolutten Héichpunkt an der Péitenger Fuesent.

Olé, Super KaGePe !